Totohanan palang nag-“live in” sina Elijah Canlas at Kokoy de Santos, ang mga bida ng breakout BL series na Gameboys.
Sa story ending ng Gameboys Season 1 ay may hint na magsasama na sila dahil kahit kailangan ni Cairo (Elijah) na umalis ay pinipigilan siya ni Gavreel (Kokoy). Sa kasunod namang movie version ay ipinakitang nagsama na nga sila sa iisang bubong.
Unbeknown to the EliKoy fans, na-extend pala in real life ang pagli-“live in” no’ng dalawa.
Nagkabistuhan lang sa pa-livestream para sa Gameboys Season 2, na ipinalabas sa The IdeaFirst Company Facebook at YouTube accounts, nang may marinig na boses sa background na nagsabing “umamin na kayo.”
Nagulat ang dalawang aktor—na magkasama in the flesh dahil bumaba pa from Baguio si Elijah para lang magkasama silang mag-promote—at tila na off-guard dahil wala naman yata silang planong aminin na minsan na pala silang nagkasama talaga sa iisang bahay.
“For a couple of months after shooting Season 1 of Gameboys, me and Kokoy decided to live together,” maikling paliwanag ni Elijah.
“Yes, totoo ’yung sinabi ni Elijah,” pag-echo naman ni Kokoy.
“Kasi ang dami ring ganap, e,” dagdag-paliwanag ni Elijah. “As some of you guys know, si Kokoy lives in Cavite. Malayo. And nu’ng time na ’yun, sunud-sunod ang rehearsals, tapings, shoots, interviews... Ang dami naming ginagawa. Masyadong hassle ’yung biyahe for him.
“E, at that time I have an extra room sa [condo] unit ko. So, ’yun doon muna si Kokoy. Marami nag-aakala na bumibisita lang si Kokoy doon. And hindi nila alam doon talaga siya nakatira. Ang saya ring housemate ni Kokoy.”
At doon na ibinuking ni Kokoy na makalat si Elijah sa bahay at kung saan-saan nito inilalagay ang mga damit. Natawang-nainis naman si Elijah sa panlalaglag ni Kokoy.
Samantala, natanong ang dalawa kung possible daw kayang magka-Season 3 pa rin ang Gameboys nila.
“I-manifest na natin, na magkakaroon ng Season 3,” natatawang saad ni Elijah. “Sana. Siguro next level na ng relationship. Na-try na natin sa video call, long distance. Na-try na rin natin ’yung in the flesh na magkasama sila sa bahay with the rest of the Gameboys gang...”
Kung level up ang usapan, possible daw kayang mag-adopt na sila na baby para makabuo ng family sa series?
“Maganda na may anak na tayo,” natatawang in character na sakay ni Elijah while directly addressing Kokoy.
“Lima. Lima. Hahaha!” deklara niya sabay nakipagharutan sa katabing si Kokoy.
“Ako, sa akin lang naman...baka p’wedeng matuloy [ang istorya] sa ibang lugar. Masarap ’yun,” seryosong pagwi-wish list naman ni Kokoy.
“Saan kaya? Sa Japan? say ni Elijah.
“Sa Baguio?” birong lahad ni Kokoy. “Pero hindi seryoso nga, sa Japan, New York...”
“Kahit saan basta kasama ka,” pagpapa-kilig ni Elijah.
Sa tanong naman kung ano raw ang naging favorite acting performance nila sa naunang Gameboys...
“Wow! Magiging acting critic na tayo ngayon,” tumawang sabi ng EliKoy.
“Acting style? ako I really…sobrang bilib ako kay Kokoy,” panimula ni Elijah. “I mean, una pa lang, Gameboys Season 1 pa lang, parang I know I had to step up in the game kasi si Kokoy napaka-natural na aktor at nakikinig talaga siya. Ramdam ko na nakikinig talaga siya kasi ang dami niyang adlib.
“You have to be on your toes all the time with Kokoy kasi ang dami niyang ibang adlib. So, kailangan sasagutin mo rin ang adlib niya. Ang saya-saya niyang kaeksena.”
“Okey ka na?” balik na tanong naman ni Kokoy kay Elijah. “Hiyang-hiya naman ako sa Gawad Urian. Hahaha!”
(Nanalo kasing Best Actor si Elijah sa Gawad Urian noong 2020 para sa pelikulang Kalel, 15 na idinirek ni Jun Robles Lana.)
“Wala, wala akong masabi kay Elijah,” sabi naman ni Kokoy sabay hila kay Elijah at sinabing: “Idol, pa-kiss naman, pa-kiss naman.”
Kilig-kiligan ang mga nanonood sa kanilang fans sa paghaharutan nila.
Makakasama ng EliKoy sa Season 2 sina Adrianna So, Kych Minemoto, at Miggy Jimenez plus may special guests pa na sila Alex Diaz at Paolo Pangilinan, na kapwa bahagi na rin ng Gameboys Universe. Ito ay mula pa rin sa direksyon ni Ivan Andrew Payawal at produced ng The IdeaFirst Company nina Direk Perci Intalan at Direk Jun Lana.
Bukod sa Gameboys 2, may dagdag-surpresa rin sa fans sina Elijah at Kokoy sa paglalabas nila ng Gameboys Gamebox na mabibili online sa theideafirststore.com (http://theideafirststore.com/).
Naglalaman ito ng season pass sa KTX.ph para sa buong season ng Gameboys 2, special blueray copy ng Gameboys 1 na in-order pa sa Japan, and more surprise Gameboys items and collectibles.
Ang Gameboys Season 2 ay nai-stream na ngayon sa ktx.ph at Vivamax Plus.
FOLLOW US ONLINE:
Facebook: facebook.com/pikapikashowbiz
Twitter: twitter.com/pikapikaph
Instagram: instagram.com/pikapikaph/
YouTube: youtube.com/pikapikashowbiz
TikTok: https://vt.tiktok.com/ZGJBapkV4/
and join our Viber Community: tinyurl.com/PikaViber
